அம்மாவைப் போல்

பதில் தெரிந்த வினா
எப்ப தான் கேப்பான்
ஏங்கியிருந்த எனக்கு
பாட்டி மூக்கில்
ஏம்மா பஞ்சு
என்ற எளிமையான
கேள்விக்கு
விடை தெரிந்தும்
விழிகள் வேகுது நீரில்...

பெரிய அண்ணன்
நிறைமாத அண்ணியோடு
அம்மா முன் அழுது புரண்டு
என்னையும் தேற்றினான்
அமெரிக்காவிலிருந்து
கணினியில் வந்து...

தொழில் கருத்தரங்கு
தொடர்பாக
துணைவியோடு
அயல்நாடு போன
சின்ன அண்ணனோ
விரைந்து திரும்புகிறேன்
காத்திருக்க வேண்டாம்
குறுஞ் செய்தியில்...

கால்களைப் பிடித்து விட்டு
கண்ணயர வைக்கும்
உன்னை
கண்ணயர்ந்து தூங்கினாயா
கேட்டதில்லையே
ஒருமுறையும்
தோள்களில் தவழாத
குழந்தையாய் வளர்ந்தவர்
பாவ மன்னிப்பு கோருகிறார்
பூவும், பொட்டுமாய்
புகைப்படத்திலிருந்து
அப்பா...

இன்னும் சற்று நேரத்தில்
ஆரம்பம்.....
மறைந்து சென்று
தீயில் கருகும்
மாதவிடாய்த் துணி போல
அவளது பயணம்....

சடங்குகள் முடித்த
கணவன் கரங்களை
இறுக பற்றி
திரும்பும் போது
சங்கடங்கள் மனசில்
ஏதுமில்லை... யாரிடத்திலும்....

எல்லோரும் நல்லவரே ...
எல்லோரும் நல்லவரே ...

அம்மா, அக்கா, தோழி
மகள், மனைவி, மாமியார்
ஆயிரம் பெயர்கள்
இருந்தாலென்ன
எல்லோரும் என் இனமே
அம்மாவைப் போல்
பயணங்கள் போவும் போது....